Владата на Данска планира да изгради 9 вештачки острови на брегот на Копенхаген (на 10 километри јужно од градот) кои ќе зафаќаат површина поголема од 3 милиони метри квадратни. Новите острови ќе бидат наречени „Holmene“, а владата се надева дека тие ќе станат футуристички дом за нови одржливи бизниси и трговија – еден вид на европска „силиконска долина“.
Островите ќе бидат изградени со вишокот почва од градежните проекти во таа област, поточно од околу 26 милиони кубни метри материјал, а нивната конструкција треба да започне во 2022-та и првиот остров да биде оперативен по околу 6 години од тогаш.
Со сегашниот распоред, целиот проект би требало да биде комплетиран околу 2040-та.
Островите ќе бидат изградени со гребени и помали островчиња каде ќе живее разен вид див свет, а ќе имаат ветерни турбини за производство на електрична енергија.
Островите можат да бидат и тематски развиени, создавајќи најдобри услови за иновативните и истражувачки индустрии како што се оние поврзани со еколошката технологија, биотехнологијата и идни засега непознати сектори.