По хаваријата во Чернобил во 1986 (најлошата нуклеарна катастрофа досега), поголемиот дел од контаминираните области околу оваа нуклеарна централа биле затворени.
Забранетата зона сега се протега на скоро 2600 квадратни километри и таму е нелегално да се живее (иако неколку фамилии го прекршиле законот со тоа што повторно се вселиле), а не смеат да ја посетуваат луѓе помлади од 18 години.
Со декади, на туристите кои доаѓале во оваа област им било само дозволено да ги набљудуваат напуштените школски дворови, паркови и училници, реони кои веќе не се сметаат за опасни, а злогласниот Реактор 4 каде се има случено експлозијата бил затворен за сите освен за истражувачите, работниците кои работеле на неговото чистење и за неколку новинари.
Туристичките компании во Чернобил сега решиле да им овозможат на туристите да ја посетат контролната соба на овој реактор, каде нивото на радијација и денес е околу 40 000 пати повисоко од нормалното.
За да се осигура безбедноста на посетителите, тие ќе мора да облечат заштитно одело, кацига, маска и индустриски чизми, а за време на турата која трае самo 5 минути, ќе бидат двапати проверувани за радијација.
По серијата „Чернобил“ која беше емитувана овој мај и која освои 10 Еми награди и беше исклучително добро примена од гледачите низ цел свет, туристичките компании пријавиле огромно интересирање за турите. Околу 85 000 туристи оваа година ја посетиле забранетата зона, а една целодневна тура чини околу $100 по човек.
Во јули, Украина го прогласи Чернобил за официјална туристичка агенција со цел да се регулира туризмот во оваа област, кој претходно не бил официјализиран па некои посетители ги поткупувале безбедносните службеници за нелегално да отстрануваат и да си земаат објекти од зоната.
Владата на Украина исто така планира да инвестира и во нови патеки и контролни пунктови, со кои би се подобрило искуството на посетителите на Чернобил.