Низ светот постојат илјадници деца сираци кои со нетрпение очекуваат да го пронајдат својот нов дом. Сепак, за многу од нив, оваа желба никогаш нема да биде исполнета, бидејќи многу родители не би се нафатиле да ги посвојат.
Малата Алба е девојче родено со Даунов синдром, состојба поради која била отфрлена од својата мајка, роднините, а воедно и од повеќе од 20 семејства. Само 13 дена од раѓањето, приказната за Алба добива среќен крај кога самохраниот, Лука Трапанесе, решава да ги поднесе документите за посвојување без разлика на синдромот.
-Кога првпат ја зедов во раце бев обземен од радост. Веднаш почувствував дека ми е ќерка. Тогаш за првпат држев новороденче. Претходно, се плашев. Но, кога првпат ја држев Алба, знаев дека сум подготвен да ѝ бидам татко, вели тој.
Првично социјалните служби го одбиле неговото барање за посвојување бидејќи немал партнер, но потоа решиле да направат исклучок и да му го доделат старателството.
Како што вели и самиот, неговиот случај ги уништува сите стереотипи поврзани со семејството, татковството и религијата.
Две години подоцна, малата Алба живее среќно и исполнето, а Лука во меѓувреме напишал и книга во која го раскажува целото искуство околу посвојувањето на дете со Даунов синдром. Тој редовно споделува фотографии од својата ќерка на Instagram и заедно со своите пријатели и соработници ја зголемува свесноста за децата и возрасните со посебни потреби и за тоа како треба да бидат прифатени во општеството.