Вечниот ерген конечно рипна во тавче со неверојатната Амал Аламудин. Овој викенд очите на сите беа вперени во Венеција, местото каде што тие се венчаа и приредуваа различни забави за нивните гости.
И за разлика од другите познати личности, фотографиите од нивната венчавка брзо излегоа во јавност.
Мора да признаеме дека 36-годишната Амал изгледаше неверојатно во сите комбинации, одбрани од престижни дизајнери почнувајќи од Александер Меквин, Долче и Габана, Џамбатиста Вали и Стела Мекартни. Изборот за венчаницата му припадна на легендарниот Оскар де ла Рента, кој изработил магична венчаница за долгокосата бринета. Овој фустан со француска тантела е украсен со дијаманти и бисери.
За разлика од неа, Клуни се одлучил за неговиот омилен дизајнер Џорџо Армани, кој му креирал костум што совршено му ја оцртува фигурата.
Со сигурност може да кажеме дека овој модел на фустан ќе го гледаме на повеќе венчавки, исто како што беше случајот и со фустанот на принцезата Кејт Мидлтон.
Официјалните фотографии им припаднаа на магазинот Hello! и People, за кој Клуни даде и ексклузивно интервју. Тој изјавил дека се чувствува неверојатно што вистинската жена конечно го носи токму неговото презиме.