Откако дојде Мурињо во Интер, италијанскиот клупски фудбал многу се смени, посебно во видот на најавите и одјавите на натпреварите па така беше и по неделното дерби.
Португалецот е секогаш подготвен да направи атмосфера со своите изјави “под појасот“ со кои го опфати и Бразилецот Кака по миланското дерби во кое славеше Милан 1:0 со погодокот на Роналдињо на асистенција на Кака.
“Мурињо навистина може да ме насмее со своите изјави. Рекол дека сум го одглумил прекршокот на Станковиќ, и дека без причина сум паднал на тревата и валкал за да украдам некоја минута. Тоа е смешно господине Мурињо, бидејќи сето тоа се случи во ваша близина“, одговорил Кака и продолжил:
“Не, нема да кажам дека имаше повеќе грубост. Сите ние надвор од теренот се познаваме многу добро, некои се и одлични пријатели. Но, на натпревар атмосферата е друга и нормални се прекршоци кои понекогаш излегуваат од контрола. А, такви неколку ги претрпев во неделата“.
Кака ја коментирал и играта на својот сонародник Роналдињо, кој го реши натпреварот.
“Можеби имаме различен живот надвор од теренот и можеби нема да не видат често во такви ситуации, но на теренот сме едно. Многу ми е драго поради него, бидејќи тој ваков натпревар заслужил. И секој ден ќе биде се подобар“, рекол Кака и заклучил:
“Мислам дека ја заслуживме победата. Ако ништо друго, тогаш повеќе тежнеевме на напаѓачкиот фудбал“.