Според пишувањата на англискиот весник News of the World, напаѓачот на Ливерпул, Фернандо Торес би можел да стане најскап фудбалер во историјата на фудбалот ако реши да си замине од Енфилд. Имено, Челзи и Манчестер Сити се согласиле да понудат неверојатни 140 милиони фунти за да го осигураат потписот на Шпанецот.
Освен тоа двата клуба наводно се подготвени да му обезбедат неделна плата од 280 илјади фунти. Оваа сума ја надминува досегашниот рекорден премин од 80 милиони фунти на Кристијано Роналдо во Реал Мадрид.
Познато е дека Ливерпул би се нашол во многу големи проблеми доколку не обезбеди место кое води во Лигата на шампионите следната сезона. "Црвените" ќе изгубат доста пари, а ќе немаат доволно да ги исплатат ѕвездите во тимот, па така ќе бидат принудени да ги продаваат.
Рафа Бенитез посочи дека нема намера да се откаже од најдобрите, меѓутоа тој не може ништо да стори доколку сопствениците се согласат за трансфер. Пред неколку дена беше соопштено дека Интер, покрај Реал Мадрид и Барселона подготвува мега-понуда до уште една ѕвезда на тимот од Енфилд, капитенот Стивен Џерард.