Скапоцените парчиња хартија кои обезбедуваат влез на најголемото светско дерби во моментов меѓу Реал и Барселона од вчера повеќе ги нема во продажба. На четири дена пред одигрување на најновото Ел Класико, зафатени се сите места на Сантијаго Бернабе што гарантира невидена атмосфера на дербито.
"Вистинско лудило владее пред мечот. Секој сака да го гледа дуелот меѓу двата најголеми клубови во светот. Може да се наполни уште еден Сантијаго Бернабе", напиша вчера Марка на својата интернет-страница.
Околу 65 илјади места се резервирани уште пред почетокот на првенството со сезонски билети. Тоа значи дека во продажба биле пуштени 17 илјади влезници кои вчера "пламнаа" за неполн час. Дербито се игра в сабота од 22 часот и директно решава за освојувачот на шампионската титула во Примера.