Една од ѕвездите на Реал Мадрид Кака ќе го пропушти големото шпанско дерби со Барселона откако стана јасно дека нема шанси да се соземе од проблемите со хернија. Ситуацијата стана јасна откако во понеделникот тренерот Мануел Пелегрини имал разговор со физиотерапевтот Педро Куека, кој му соопштил дека на Кака му е потребно време за заздравување и дека не трева да ризикува со пуштање предвреме во "оган", по што Чилеанецот веднаш го отпиша од составот за големиот дуел кој решава за титулата во шпанското првенство. Моментално Кака работи индивидуално со полесно трчање и вежбалница, меѓутоа се уште никој од клубот не може да потврди кога Бразилецот би се вратил на фудбалските терени. Последен пат се појави на 10 април кога ги одигра последните 13 минути од реванш мечот од Лигата на шампионите со Лион кога неговиот тим испадна од трката по трофејот.
Оваа повреда не е ништо ново за Кака бидејќи поради истата претходно отсуствуваше речиси месец и половина. Откако пристигна во Мадрид никако не може да ја развие својата препознатлива игра, иако за него Реал плати 64 милиони евра. Оваа сезона одигра вкупно 22 натпревари, а постигна само осум погодоци.