Лондон,29 јули 2010 (МИА) - Тренерот на Ливерпул Рој Хоџсон изјави дека стравува за исходот на натпреварот со Работнички во Скопје, затоа што поради ситуацијата во која се наоѓа овој познат англиски премиерлигаш, во главниот град на Македонија мораше да отпатува со многу млади и неискусни фудбалери.
Во разговор за БиБиСи, Хоџсон рече дека екипата игра во Скопје против силен противник кој, како што објасни, преку мечот со Ливерпул ја гледа својата шанса за афирмација и напредок на европската сцена. Првиот човек на овој англиски клуб призна дека вечерашната средба со македонската екипа резултатски е сосема неизвесна, што е сосема спротивно од очекувањето на навивачите на Ливерпул и на англиската фудбалска јавност, дека Работнички не е противник од кој треба да се стравува.
За Македонија не отпатуваа Стивен Жерард, Џејми Карагер, новото засилување од „Челзи" Џо Кол, како и Глен Џонсон, затоа што тренерот Хоџсон сака да им остави повеќе време за опоравување по обврските што ги имаа со англиската репрезентација на Светското првенство. Овие четворица играчи пред една недела се вклучија во тренинзите пред новата фудбалска сезона.
- Не сакав да го однесам Жерард во Скопје за да игра само последните десет минути од натпреварот, како резерва, објасни новиот кормилар на Ливерпул.
Поради повреда дома остана и Фернандо Торез, двајцата Аргентинци Хавиер Маскерано кој најави дека би сакал да го напушти Ливерпул и Макси Родригез, кои штотуку почнаа со тренинзите во клубот, како и холанѓанецот Дирк Кајт кој играше до последниот ден на светското првенство во Јужна Африка.
Лондонските медиуми забележуваат дека на Ливерпул „очајнички му е потребен успех“ во Македонија и учество во натпреварите во групи во Европската лига, по минатогодишната катастрофално лоша сезона во домашното првенство и во европските натпреварувања. Победата во дуелите со Работнички, му се мошне важни и на Хоџсон, откако тој од лондонски „Фулам“ се пресели во Ливерпул, клуб чии амбиции секоја година се мошне големи. Според лондонските медиуми Рој Хоџсон преку Скопје ќе треба да покаже дека неговите минатогодишни успеси со Фулам на меѓународната сцена не биле случајни.