Себастијан Фетел вели дека има огромна желба да стигне до првата победа на Германското ГП во Хокенхајм, каде што овој викенд ќе се обиде да ја намали предноста на Фернандо Алонсо во генерален пласман. Откако заврши на подиумот во Силверстоун, Фетел е трет во генерален пласман со 29 поени зад Алонсо, но и 16 зад тимскиот колега Марк Вебер, кој победи во Британија.
Меѓутоа, до финишот на сезоната има уште многу, бидејќи трката во Хокенхајм е 10. од 20 на календарот. Фетел израсна во близина на патеката, но нема победа на домашен терен и очекува голема поддршка на фановите.
"Едвај ја чекам трката во Хокенхајм и се надевам дека ќе има барем толку фанови како во Силверстоун минатиот викенд. Хокенхајм е на само половина час од мојот роден град, така што ќе има многу членови на семејството и пријатели и тоа е секогаш посебна публика. Сум возел на Хокенхајм во повеќе серии и секогаш било одлично", вели Фетел.