Селекторот на македонската кошаркарска репрезентација до 20 години Горан Самарџиев го сумира сработеното во изминатиот период од подготовките за настап на претстојното Европско првенство – Дивизија Б.
- Задоволен сум од досегашното залагање на момците, бидејќи, и тоа како, се борат за место во тимот. Засега имаме навистина добра атмосфера, и секој ден гледаме да напредуваме се повеќе и повеќе како репрезентација, без разлика на тоа што овие момци немаат, ама скоро никакво, прволигашко искуство. Секој од нас мора да даде максимум кога игра за Македонија, изјави Самарџиев.
Македонските кошаркари во првиот дел од подготовките одиграа три пријателски натпревари на гостувањето во Романија - два против соодветната селекција на Романците и уште еден против нивната селекција „Под 18“ години.
Согласно со планираните активности, веќе во среда, во Скопје, поточно во салата на СРЦ „Кале“ (од 17 часот) ќе гостуваат младинците на Косово. А два дена подоцна, во петок, предвидено е гостувањето во Качаник, каде двете репрезентации ќе го одиграат и вториот пријателскки натпревар во средишниот дел од подготовките за настап на ЕП од Дивизијата „Б“ во Ереван.