Босанскиот кошаркарски репрезентативец Џанан Муса ќе го напушти Реал Мадрид по три години минати во шпанскиот клуб.
Муса ја обзнани одлуката по синоќешниот последен натпревар од финалето во шпанското првенство во кое Реал Мадрид ја освои титула откако ја победи Валенсија со 3-0 во серијата до три победи.
„Навистина сум емотивен. Еден момент сум среќен, следниот тажен. Реал Мадрид е моето семејство и ова беше мојот последен натпревар со тимот“, изјави Муса, потврдувајќи ја одлуката за која се шпекулираше во последните недели.
Во текот на трите години минати во Реал Мадрид, босанскиот кошаркар освои една титула во Евролигата, две шпански титули, еден трофеј во Куп на кралот и два шпански Суперкупа.
Минатата сезона, Муса имаше просек од 12,2 поени, 2,9 скокови и две асистенции во натпреварите од Евролигата.
Според повеќе извештаи, се очекува Муса да му се приклучи на тимот од Дубаи со долгорочен договор.