Македонскиот и европски шампион на ридски патеки Игор Стефановски – Иџе го поправи оштетеното возило и е подготвен викендов да се натпреварува на патеката Добшниски Копец во Словачка.
Тимот на Иџе ги замени оштетените делови на неговото Mitsubishi Lancer Evo IX и ќе може да учествува на следните две трки од Европското првенство во Словачка и Германија. Патеката Добшниски Копец во Словачка е долга 6.810 метри домаќин на осмата трка од Европскиот шампионат на ридски патеки, а од вкупно пријавени 116 возачи во групата Н, заедно со Стефановски има пријавено 10 возачи. Од нив, за Иџе би требало најголем проблем да биде домашниот шампион Властимил Мајерчак.
- Мајерчак не само што е одличен возач, туку и ја познава оваа патека до перфекција. Неговиот татко е и организатор на трката. Се зависи во каква состојба ќе биде моето возило. Ако е се во ред, тогаш ќе може да одиме на победа. Мојот конкурент во генералниот пласман, Мали во групата А има послаба конкуренција и неговата победа таму е скоро извесна. Затоа немам простор за калкулирам во мојата група – додаде Иџе.
Стефановски моментално води во генералниот пласман со 19 бода пред Чехот Јаромир Мали.