Фетел на легендарната Монца продолжи со доминација во квалификациите во годинешниот шампионат и оствари најдобро време од 1:22.275 минути со што стигна до десеттата пол позиција. Младиот Германец беше подобар од дуото од Мекларен, Луис Хамилтон, кој заостана половина секунда и Џенсон Батон. Од четвртата стартна позиција ќе тргне возачот на Ферари, Фернандо Алонсо, а зад него е вториот возач на Ред Бул, Марк Вебер.
Натаму следат Бразилецот Фелипе Маса, Виталиј Петров од Лотус Рено и седумкратниот светски првак Михаел Шумахер, кој е рекордер по бројот на победи (пет) на патеката во Монца. Првите десетмина ги комплетираа тимскиот колега на Шумахер, Нико Розберг од Мерцедес и вториот возач на Лотус Рено, Бруно Сена. Трката се вози утре од 14 часот.