Тест-возачот на Ферари и поранешен ГП возач, Марк Хене смета дека Себастијан Фетел целосно ја заслужува светската титула оваа година, но дека Фернандо Алонсо останува "најкомплетниот" возач на денешницата. На Фетел му е потребен само еден поен за втора титула по ред со Ред Бул, додека откако Алонсо не заврши на подиумот во Сингапур испадна од борбата за титулата.
"Сите возачи во формула 1 се многу добри, но мене ми се допаѓаат тројца - Фернандо, Хамилтон и Фетел. Нема сомнеж дека Себастијан возеше на одлично ниво и дека имаше совршена сезона и мислам дека веќе се чувствува како шампион и дека ќе вози без притисок. Но, број 1 останува Алонсо, бидејќи тој е најкомплетниот возач. Фернандо е лидер поради неговото професионално однесување. Да, вистина е дека тој бара многу од тимот, но бара уште повеќе од самиот себе. Не ми се веруваше колку бргу ја доби почитта на сите во Маранело, во Ферари и во Италија", вели Хене.