Помалите Формула 1 тимови не се согласуваат со начинот на кој Светската автомобилистичка федерација (ФИА) толку бргу се откажа од плановите за лимит на трошењето во спортот. ФИА лани најави дека правилото се воведува од 2015 и дека тимовите мораат да го имаат буџетот до јуни оваа година, меѓутоа претседателот на ФИА, Жан Тод, откри дека идејата е неостварлива.
Ова ги налути тимовите кои не се во сопственост на големи компании, кои сметаа дека така ќе се израмни односот на силите помеѓу тимовите. Шефицата на Заубер, Мониша Калтенборн, не сфаќа зошто планот е сопрен.
„Зборувајќи за нас како помал тим не сфаќам зошто не се направи таа промена бидејќи сите треба да бидат одговорни за работењето на еден спорт. Поминаа тие времиња кога едноставно се велеше: ’ако немаш пари, не учествувај’. Трошоците во Формула 1 се несфатливи, посебно во оваа економија“, вели Калтенборн, првата жена на позиција на шеф на тим во Ф1.
Заменикот шеф на Форс Индија, Боб Фернли, најави дека тие нема да се откажат од барањето за лимит на трошењето, иако Тод беше песимист.
„Мислам дека постојано треба да правиме притисок бидејќи Форс Индија докажа дека не треба да трошиш како луд за да направиш добро шоу“, вели Фернли, чиј тим е на второ место во генерален пласман, веднаш зад Мерцедес.
Калтенборн смета дека големите тимови играат политички игри со шефовите на тимовите заканувајќи се со ззаминување доколку се постават граници.
„Би сакала да кажам дека тие луѓе кои се закануваат со заминување од спортот, треба да го направат тоа. Тогаш овие политички игри ќе сопрат“, додава одговорната во Заубер.