Новиот Nissan GT-R NISMO дебитираше на овогодинешниот New York Motor Show, а доаѓа со мноштво подобрувања во перформансите, редизајниран екстериер и ентериер. Подобрувањата намалуваат повеќе од 30kg. од тежината на GT-R, што како резултат ги подобрува перформансите и ефективноста на моторот.
Моторот е модифицирана верзија на стандардниот од GT-R, односно 3.8 литарскиот V6 мотор, кој има дизајн на турбополначот позајмен од GT-R GT3. Неговата моќност е 600 коњски сили и 652Nm вртежен момент, има погон на сите тркала и 6-брзински менувач.
За да се справи со дополнителната моќност во споредба со стандардниот модел, GT-R NISMO има пар јаглеродно керамички дискови на сопирачките, Brembo калипери и подобрен систем на суспеннзија. Како дел од стандардната опрема се и Dunlop гуми со најсовремен дизајн, за кои од Nissan велат дека ја подобрува стабилноста во кривините и реакцијата од управувањето.
Промените во екстериерот вклучуваат 20-инчни алуминиумски бандажи, титаниумски издувен систем и елементи од јаглеродни влакна на браниците, кровот и вратата на багажникот.
Внатре GT-R NISMO има спортски седишта од кожа и Алкантара кои имаат пошироки перничиња за рамениците и се дизајнирани подобро да го подржуваат возачот во остри кривини.