Од денес, па секој нареден четврток Идивиди готви со Давор Панчевски и Dave's Kitchen.
Сите љубители на добрата храна ќе имаат можност да научат нешто ново преку најразличните рецепти како од солената, така и од благата кујна. За денес Давор ни приготви едноставна, но превкусна погача со спанаќ и урда.
Потребни состојки :
- 500 гр. брашно
- 250 мл. млеко
- 1 свеж квасец
- 1/2 филџан шеќер
- 1 филџан масло за јадење
- прстофат сол
- 200 гр. обарен и исечкан спанаќ
- 150 гр. урда
Во сад на страна убаво измешајте ги млекото, квасецот и едно лажиче шеќер, оставете да стаса. Доколку сакате да ја забрзате постапката на стасување млекото треба да биде млако. Стасаната смеса додадете ја во брашното. Додадете ги маслото, шеќерот и солта. Од овие состојки направете меко и глатко тесто. Оставете да стаса 1 час на собна температура или додека не ја зголеми двојно големината.
Урдата и спанаќот измешајте ги заедно.
Стасаното тесто расукајте го на работната површина во кора дебела околу половина сантиметар. Со помош на чаша вадете кругови. Во секој од круговите нанесете по 1 лажиче од смесата со урдата и нежно превиткајте го на половина, па потоа спојте ги краевите. Редете ги во подмачкано тавче на растојание од половина сантиметар. Постапката ја повторуваме додека не се исполни целото тавче.
Ја оставаме погачата да стаса половина час, ја премачкуваме со жолчка, а во меѓувреме ја загреваме рерната на 180 степени. Се пече околу 20-30 минути или додека не зарумени убаво.