Доколку сакате да направите колачиња, а на располагање немате многу време, овој рецепт е идеален за вас! Направете колачиња со путер од кикирики за чија подготовка не се додава ниту грам рафиниран шеќер, а целата постапка ќе ви одземе само 20-тина минути. За истата не е потребно печење, туку само блендер!
Потребни состојки:
- 2 шолји овесни снегулки
- ½ мала лажичка морска сол
- 10 урми
- 150 гр путер од кикирики
- 6 лажици млеко (по можност ореово или бадемово)
Подготовка:
За почеток ставете ги овесните снегулки и морската сол во блендер и добро иситнете ги. Потоа додадете ги урмите и путерот од кикирики и миксајте уште 45 секунди. Додадете од млекото и домиксајте уште кратко, додека истото не се соедини со смесата.
Ставете хартија за печење на тавче или послужавник кој ви го собира во фрижидерот и на неа обликувајте колачиња од смесата по желба. Ние формиравме кругчиња.
Ставете ги колачињата во фрижидер да отстојат 15 минути за да се стврднат.
Добар апетит!