Сите кои имаат микробранова печка знаат колку е овој апарат практичен, па откако сте се навикнале на неговата употреба, не можете да си ја замислите кујната без него, како и подготвувањето и погревањето на многу намирници.
Сепак, постојат одредени правила за употребата на микробрановата печка, во однос на она што е препорачливо да подгревате во неа, а што не смеете. За одредените видови храна кои не смеете да ги топлите веќе имаме зборувано, а сега листата ја надополнуваме и со одредени работи од поинаков вид.
Еве ја листата на работи кои не смеете да ги топлите во микробрановата печка:
- Алуминиумската фолија може да предизвика пожар, затоа што од неа се одбиваат микробрановите. Истото се однесува и на садовите со шари и украси со рефлексна површина (златна или метална боја). Погледнете го несаканиот ефект во видеото.
- Термоси од нерѓосувачки челик. Топлината ќе биде блокирана од загревање на течноста, а тоа може да ја уништи вашата печка.
- Металните или пластични рачки на кутиите за храна можат да предизвикаат пожар.
- Пластични садови. Никако не се препорачува да се подгрева храната во пластика бидејќи хемикалиите кои ги содржи пластиката може да завршат во вашата храна.
- Садовите за храна за носење од стиропор. Стиропорот е вид на пластика.
- Сувото грозје испушта чад додека се подгрева.
- Свежото грозје може да се запали и да предизвика пожар.
- Пластични кеси. Тие се негихиенски, може да испуштаат токсични материи и да предизвикаат пожар.
- Хартиени кеси за пазарување. Тие се опасни како и пластичните.
- Јајца со лушпа исто така не треба да ги подгревате во микробрановата. Наглата топлина од печката предизвикува создавање на притисок, кој може да резултира со експлозија. Погледнете во видеото.
- Суви лути пиперчиња. Хемикалиите кои ќе се испуштат од нив ќе ви ги надразнат очите и ќе ви го изгорат грлото.
- Сосот без капак може да направи вистински неред. Поклопете го садот со тацна за внатрешноста на не прска на сите страни кога ќе почне да врие.
- Ништо. Никако не смеете да ја пуштате микробрановата да работи празна. Недостатокот на молекули на вода, кои инаку ги апсорбираат микробрановите, ќе предизвика оштетување на печката.