Хаг, 22 јули 2010 (МИА) - Меѓународниот суд на правда денеска ќе го соопшти своето мислење за легалноста на прогласувањето независност на Косово.
Мислењето се соопштува врз основа на барањето на Генералното собрание на Обединетите нации кое во октомври 2008 година усвои резолуција со која се бара советодавно мислење.
Читањето на мислењето почнува во 15 часот во зградата на судот во Хаг и на него ќе присуствуваат претставници на Белград, Приштина и амбасадори на земјите кои учествуваа во јавната расправа.
Центарот за европски студии на Универзитетот во белгискиот град Гент и приштинскиот Институт за истражување вчера објавија заедничка анализа според која Меѓународниот суд на правдата има три опции, од кои две би биле во интерес на Приштина, а едно на Белград.
Според авторите на анализата, првата опција е Судот да оцени дека прогласувањето на независноста на Косово била во согласност со меѓународното право, втората Трибуналот да не се изјасни по ова прашање со образложение дека во меѓународниот правен систем нема норми кои се однесуваат на прогласувањето независност, и третата да оцени дека косовската независност не е во согласност со меѓународното право.
Приштинските весници оценуваат дека доколку Судот се реши за една од првите две опции тоа би било позитивно за Приштина, додека третата би ги потврдила ставовите на Белград.
Сепак, според медиумите, дури и Судот да ја прогласи косовската независност за нелегитимна Приштина би можела да ја оспори таквата одлука со образложение дека Трибуналот не решавал за тоа дали постоењето на државата Косово не е во согласност со меѓународното право, ниту дека нејзините признавања се неважечки.
По повод денешната одлука на Судот, за Хаг вчера замина косовскиот министер за надворешни работи Скендер Хисени, кој денеска ќе присуствува на објавувањето на мислењето на Меѓународниот суд на правдата.
Неговиот советник Ќерим Ќерими изјави дека Хисени е внимателен оптимист во врска со одлуката на Судот, додавајќи дека Приштина е подготвена за нови чекори во зависност од околностите што ќе се случат по утрешната судска одлука.