Приштина, 23 јули 2010 (МИА) - Ден по искажаното мислење на Меѓународниот суд во Хаг дека едностраната независност на Косово не го прекрши меѓународното право, ситуацијата во северниот дел на Косовска Митровица е мирна, соопшти Танјуг.
Капетанот на косовската полициска служба Нусрет Мехмети за Танјуг изјави дека денеска во регионот на Митровица е во сила оперативен план за зголемување на степенот на готовност во заедничките градски зони со цел да се зачува јавниот ред и мир.
-Ноќта во регионот на Митровица мина мирно и не беше регистриран ниту еден инцидент. И денеска во сила ќе биде засиленото полициско присуство во регионот и во зависност од ситуацијата ќе се зголемува бројот на членови на косовската полициска служба на теренот, изјави Мехмети.
Освен косовската полиција, и војници на КФОР се разместени на неколку места во заедничките градски зони, во кои освен Срби живеат и Албанци.
На главниот мост на реката Ибар, што го дели северниот од јужниот дел на градот, се разместени неколку возила на ЕУЛЕКС и Косовската полициска служба.