Министерството за надворешни работи на Босна и Херцеговина испратило барање до кабинетот на претседателот на Република Српска, Милорад Додик, за враќање на неговиот дипломатски пасош, пренесува Анадолија.
Во дописот што вчера го потпишал министерот Елмедин Конаковиќ се наведува дека согласно член 9 од Правилникот за издавање дипломатски пасоши, „лице кое го изгубило својството врз основа на кое добило дипломатска патна исправа, е должно да ја врати во рок од 15 дена од престанокот на мандатот“.
Повикот е испратен врз основа на одлуката на Централната изборна комисија (ЦИК) на БиХ од 6 август 2025 година, со која е утврден престанокот на мандатот на Додик.
Мандатот на Додик му беше одземен поради правосилна судска пресуда за неизвршување на одлуките на високиот меѓународен претставник во БиХ. Во јули тој беше осуден на една година затвор, што ја откупи со уплата од 18.700 евра (36.500 КМ), како и на шестгодишна забрана за политичко делување. Според пресудата, од 12 јуни тој ја изгуби функцијата претседател на Република Српска.