Турција ќе го промовира туризмот со фреска на Пречистата Богородица и богомладенецот Исус Христос

Анкара, 31 март 2011 (МИА) - Древната фреска на Пречистата Богородица и богомладенецот Исус Христос, која датира од 10 век ќе се користи за промовирање на туризмот во Турција.

Турскиот министер за култура и туризам Еругрул Ѓунај истакна дека фреската во манастирот Ѓумјушлер во Нигде, Централна Турција, на која се Богородица и Богомладенецот се насмевнати и оти таа фреска е единствена во светот.

- Фреската ќе биде во програмата за туристичкото претставување на Турција за следната година. Фреската ќе биде во сите рекламни материјали, истакна Ѓунај.

Манастирот Ѓумјушлер се наоѓа во реонот на Кападокија и е еден од најубавите и најдобро сочуван од византиско време во Анадолија.

- Во манастирот прикажан е животот на Исус Христос, а фреската Пречистата Богородица и богомладенецот Исус Христос привлекува многу посетители, истакна директорот на регионалната Дирекција за култура и туризам во Нигде, Мехмет Коч.