Белград, 1 октомври 2012 (МИА) - Министерството за внатрешни работи на Србија ја забрани „Парадата на гордоста“ во Белград, што беше најавена за 6 октомври, соопшти попладнево белградскиот весник „Блиц“ повикувајќи се на извор во МВР на Србија.
Според информациите на „Блиц“, МВР проценило дека постои голем ризик, а забраната се однесува само на прошетката низ Белград, додека останатите настани можат да се одржат.
Весникот наведува дека српскиот премиер Ивица Дачиќ денеска изјавил дека Владата на Србија нема да донесува одлука дали треба или не треба да се одржи „Парадата на гордоста“, туку дека таа одлука и е препуштена на српската полиција.
„Парадата на гордоста“ беше забранета и минатата година со образложението на МВР дека постои безбедносен ризик поврзан за собирањето на граѓаните.