Турскиот премиер Реџеп Таип Ердоган денеска ги предупреди демонстрантите кои го окупираа централниот парк Гези во Истанбул, дека треба да го напуштат пред митингот на владеачката партија, закажан за утре.
Во спротивен случај на силите за безбедност ќе им биде наредено да го испразнат, пренесоа британските медиуми. -За утре имаме закажано митинг во Истанбул. Јасно кажав: плоштадот Таксим треба да биде испразнет, во спротивен случај силите за безбедност на оваа земја ќе го испразнат, изјави Ердоган пред десетици илјади поддржувачи на митингот во главниот град Анкара.