Белград, 19 март 2014 (МИА) - Според некои проценки од „бизнисите“ на
Дарко Шариќ и неговиот клан, кој годишно имал профит од една милијарда долари, најмалку четири милијарди се испрани во Србија, објави денеска белградскиот весник „Данас“.
Весникот истакнува дека колку и да биде детална истрагата, најверојатно никогаш прецизно нема да се утврди колку валкан капитал влегол во Србија во последните 15 години, ниту колку фирми биле вклучени во тоа.
- Најскромните проценки говорат дека од „бизнисот“ на Шариќ, кој годишно носел профит од една милијарда долари, минимум четири се испрани во Србија, а се стравува дека тој износ би можело да биде двојно поголем, посочува „Данас“.
Адвокатот на Шариќ, Радослав Бачевиќ по вчерашното сослушување пред Специјалниот суд во Белград, изјави дека неговиот клиент досега се криел во Латинска Америка и во Јужна Африка и оти доброволно се предал. Тој одлучил да се предаде откако бил лоциран во Јужна Америка од страна на безбедносните служби на Србија и на Црна Гора. Неговиот адвокат појасни дека Шариќ сакал од Јужна Америка да биде префрлен во Црна Гора за да се види со семејството, со кое добил можност да разговара околу половина час.
Шариќ се товари за организирање меѓународна трговија со дрога.