Камен-темелник на амбуланта во село Трсино - Виничко

Кочани, 18 март (МИА) - Во рамките на проектот на Владата за изградба на 17 амбуланти во руралните средини во Македонија, на пригодна свеченост во виничкото село Трсино беше поставен камен-темелник на оваа амбулантска зграда која ќе работи во состав на Здравствениот дом на Виница. Амбуланатата е со површина од 120 метри квадратни и се наоѓа во центарот на селото до каде можат да пристигнат речиси сите 160 жители од ова виничко село.

Во новата амбуланта, која се очекува да биде готова за три месеци, ќе бидат сместени ординација за лекар од општа медицина, просторија за интервенции и стоматолошка ординација.

Камен-темелникот во присуство на жителите на село Трсино го постави заменик-министерот за здравство Владо Поповски, кој истакна дека Владата за овој објект во кој ќе се пружа квалитетна здравствена заштита на населението од овој рурален дел на виничката општина, ќе инвестира четири милини и 400 илјади денари.