Виена, 29 мај 2013 (МИА) - Српскиот министер за регионалниот развој Верица Калановиќ изрази денеска увереност дека до 2020 година Србија ќе биде целосно покриена со мрежа од автопати, инфраструктурно поврзана со соседните земји и вклучена во европската патна мрежа.
- Не создаваме инфраструктура само за себе и за подобрување на сопствената патна мрежа, туку ја гледаме Србија здраво поврзана со соседите и вклучена во големите коридори, нагласи Калановиќ на средба на министрите за градежништво и инфраструктура на земјите од Западен Балкан во Виена.
Таа спомена дека Србија ја наследила од поранешна Југославија инфраструктурата, која повеќе не одговара на денешните услови, бидејќи стратешки била ориентирана да ги поврзува големите југословенски градови. Единствениот модерен автопат, наследен од Југославија е Братство и единство, кој поврзува само три српски градови или само една третина од населението во земјата.
- Поради тоа српската Влада усвои стратегија, која предвидува до 2020 година речиси сите градови со население над 100 илјади лица (такви во Србија има 18) да бидат поврзани со мрежа од модерни патишта, што значи нови илјада километри патишта, рече Калановиќ.