Европската комисија го повтори повикот до сите земји-членки да се придржуваат кон заеднички договорените мерки за ограничувањата што важат на границите во рамките на Европската унија.
Комисијата минатата недела испрати писма до Германија, Белгија, Унгарија, Данска, Финска и Шведска, во кои изрази загриженост за едностраните мерки на границата во врска со влезот и излезот од овие земји, што се воведени заради спречување на ширењето на коронавирусот.
-Во понеделник истекува рокот за одговори на шесте повикани земји. Германија и Белгија веќе одговорија, за што внимателно размислуваме, но нашиот став останува непроменет, изјави портпаролот на ЕК, Кристијан Виганд.
Во Брисел нагласуваат дека сите земји-членки на ЕУ се согласија на координиран пристап во привременото ограничување на слободата на движење во Европа.
-Препораките се јасни и очекуваме сите земји да ги почитуваат, изјави Виганд.
На крајот на февруари, Белгија забрани секаков несуштински влез и излез од земјата, додека Германија воспостави гранични контроли со Австрија и Чешка.