Еврокомесарката за проширување Марта Кос денеска престојува во Виена со цел да добие потврда за ангажираноста на Австрија во унапредувањето на агендата за проширување на ЕУ и да ја продлабочи соработката.
Како што соопшти нејзиниот Кабинет, за време на посетата Кос ќе се сретне со австриската министерка за Европа, интеграција и семејство Клаудија Плаколм, со која ќе разговара за одржливата политичка поддршка на Австрија за проширувањето, со фокус на условеноста и постепената интеграција како столбови на кредибилитетот на пристапниот процес, како и за начините за поттикнување на јавната доверба во проширувањето.
- Комесарката, исто така, ќе се сретне и со членови на австрискиот Парламент за да разменат мислења за стратешката важност на проширувањето за економијата и безбедноста на Австрија. Таа ќе ја нагласи природата на процесот базирана на заслуги и воспоставените заштитни мерки за справување со трошоците, миграцијата и управувањето, истовремено охрабрувајќи активна парламентарна комуникација што ги истакнува можностите за австриските граѓани и бизниси, се наведува во соопштението.
Предвидено е Кос да има средба и со австриската министерка за европски и меѓународни прашања Беате Мајнл-Рајзингер, со која ќе разговара за поддршката на Австрија за проширувањето и активното ангажирање со земјите од Западниот Балкан, Молдавија и Украина. –- Тие, исто така, ќе разговараат за улогата на Австрија во обновата на Украина, вклучувајќи ги можностите за австриските бизниси и поблиската координација со новоназначениот национален координатор за обнова, се додава во соопштението.
Посетата на Виена Кос ќе ја заврши со вечера со група експерти за проширување, на која се очекува да бидат разменети мислења за важноста на проширувањето во сегашниот геополитички контекст.
- Оваа мисија ја нагласува посветеноста на Европската комисија на тесна соработка со земјите членки за зајакнување на кредибилитетот, поттикнување на јавната доверба и унапредување на проширувањето на ЕУ на начин базиран на заслуги и инклузивен, потенцираат од Кабинетот на Кос.