Седрун, 15 октомври 2010 (МИА) - Швајцарија денеска свечено го одбележи пробивањето на последниот метар низ алпскиот масив Готхард, со што е отворен најдолгиот тунел во светот од 57 километри, низ кој ќе минува железничка пруга.
Швајцарските власти по тој повод прогласија „ден на радоста“, бидејќи со пробивањето на тунелот е остварен 60-годишниот долг сон на визионерите.
Свечената церемонија ја следеа и европските министри за сообраќај, кои се собрани во Луксембург.
Станува збор за завршување на важен дел од работата, започната во 1993 година, чиј крај се очекува во 2017 година, а вкупната вредност на проектот се проценува на околу 10 милијарди евра.
Преку железничкиот тунел низ масивот Готхард од Цирих до минхен ќе се стигнува за само два и пол часа, а и значително ќе биде намален патниот сообраќај во Европа.
Денешното пробивање и натамошната изградба на тунелот Готхард Базе претставуваат триумф на градежните работници и потфат со највисоки стандарди на почитување на животната средина во светот.
Тунелот Готхард Базе му го одзема светскиот примат на јапонскиот Сеикан, кој е долг 53,6 километри.