Брисел, 14 март 2012 (МИА) - Меѓу патниците во белгискиот автобус, што синоќа се судри во тунел во Швајцарија, имало и неколку деца од Холандија, соопшти медиумската група Ер Те Ел.
До моментов не е сеосема познат идентитетот на 28-те загинати лица, меѓу кои 22 се деца, како и на 24-те настрадани деца.
Утвредено е дека сите патници во автобусот биле со сигурносни колани.
Телевизиските кадри го прикажаа автобусот, кому му недостига предниот дел по челниот удар во бетонскиот ѕид од тунелот Сиер.
Страниците на автобусот се заплискани со крв.
Некои од родителите за трагедијата, што се случи синоќа околу 21.15 часот, слушнале на вестите емитувани утринава. Некои од преживеаните деца им се јавиле на своите семејства, се посочува во информациите.
Белгиските военовоздушни сили обезбедија авиони за семејствата и психолози, кои допрва треба да полетаат од Брисел кон реонот на несреќата.
Некои од родителите се уште не знаат дали децата им се преживеани.
Фирмата „Топ турс“, чија сопственост е автобусот, има добра репутација, соопштуваат белгиските медиуми. Компанијата располгаа со вкупно 14 автобуси, што работат на маршрути до зимските одморалишта во Швајцарија, Австрија, Италија и Франција. Во вчерашната екскурзија биле искористени три автобуса.
Засега од фирмата одбиваат да дадат коментар.
Како што соопштува БТА, групата деца патувала кон Белгија на враќање од зимскиот одмор во скијачкото одморачиште во Вале.
Министерот за внатрешни работи на Белгија Жоел Милке прециизра дека во несреќата не учествувале други превозни средства, како и дека нема траги од кочење на патот крај автобусот.