Брисел, 16 март 2012 (МИА) - Во Белгија денеска е прогласен ден на национална жалост во помен на
загинатите 22 деца и шестмина возрасни од несреќата на патничкиот автобус во Швајцарија, во вторникот.
Во несреќата 24 деца беа повредени.
Точно во 11.00 часот ќе се оддаде минута молк. Автобусите, метрото и трамваите ќе запрат на најблиската станица, каде една минута ќе ги исклучат своите мотори.
Камбаните на црквите во цела земја ќе почнат да бијат во 11.01 часот, во траење од неколку минути.
Националните знамиња до недела ќе бидат спуштени на половина.
Во Брисел денеска се очекува да пристигнат првите тела на загинатите, пренесени со авиони на белгиските военовоздушни сили.
Белгија денеска е во жалост, за прв пат од 1993 година, кога се одбележа смртта на кралот Бодуен.