Во Чешка 1 Мај прославен со протестиПрага, 1 мај 2012 (МИА) - Низ улиците на Прага денеска по повод 1 Mај, Меѓународниот ден на трудот, се одржуваат демонстрации и походи на приврзаниците на радикалните левичарски и ултрадесничарски движења, јави дописникот на МИА од чешкиот главен град.
Во центарот на чешката метропола полицијата со кордони ги одвои неколку стотиците приврзаници-анархисти и десничарски радикали кои на себе фрлаа пластични шишиња и други предмети.
Анархистите, кои носеа црвено-црни знамиња, пиратски симболи и извикуваат пароли против капитализмот, претходно се потсетија на штрајкот на неколку илјади работници во Чикаго во мај 1886 година и жртвите во немирите.
Тие сметаат дека Денот на трудот е нивни празник, кој социјалистите и комунистите неосновано им го присвојуваат
Чешката крајна десница, олицетворена во Работничката партија за социјална правда (ДССС), одржа протести против Владата под мотото „За социјална сигурност - против реформите“. Нивните приврзаници се познати по своите националистички и ксенофобични изјави.
Собир денеска одржа и најголемата партија на левиот блок, опозициската Чешка социјалдемократска партија ЧССД и симпатизерите и членовите на Комунистичката партија на Чешка и Моравија (КСЧМ).
Наспроти политичките акции, како и секоја година на ридот Петрин во Прага, неколку стотици млади луѓе се собраа да го прослават денешниот ден како „Ден на љубовта“ бакнувајќи се под крошните на расцветаните цреши, верувајќи дека љубовта ќе им трае цела година.
|