Киев, 21 февруари 2014 (МИА) - Украински демонстранти отворија оган врз полицајци во Киев, кои се наоѓаат на просторот меѓу плоштадот „Независност“ и Парламентот.
- Учесниците во масовните немири пукаа врз припадници на полицијата и се обидоа да се пробијат до зградата на Парламентот, соопшти полицијата.
Во соопштението не е прецизирано дали полицијата возвратила на нападот.
Во меѓувреме опозицискиот лидер Арсениј Јацењук нагласи дека вооружени полицајци влегле во зградата на Парламентот.
Министерството за внатрешни работи соопшти и дека непознати лица ја опожариле канцеларијата на владејачката Партија на регионите во Днепропетровск.
Седницата на украинскиот Парламент беше прекината еден час по предлог на Јацењук. Тоа е направено со цел да се согласат за нацрт-законот за враќање на Уставот од 2004 година.
Во моментот, пратениците се во пленарната сала во Парламентот, јави Украинската телевизија.
Со таа реформа ќе бидат ограничени надлежностите на претседателот на сметка на Парламентот.
Претходно претседателот на парламентот Володимир Рибак објави прекин на работата до 16 часот по локално време, но опозициски пратеници го попречија да се симне од говорницата.
Во меѓувреме полското Министерство за надворешни работи соопшти дека преговорите во Украина за излез од кризата на кои учествуваат полскиот и германскиот министер за надворешни работи ќе продолжат напладне во 12 часот по локално време.
Според претходните информации на украинската телевизија на средбата која траеше до рано изутринава договорено е одржување предвремени претседателски избори, коалициска влада и уставни реформи.
Министерот за внатрешни работи Виталиј Захарченко изјави дека билансот на загинатите во Киев од вторникот до денеска достигнал 80 луѓе.