Скопје, 6 октомври 2015 (МИА) - Градоначалникот на Општина Центар Андреј Жерновски најави дека денеска на седница на Советот на Општината ќе биде донесена одлука со која ќе се забрани градба на кејот „13-ти Ноември“, а која ќе ги опфати изградбата на улица и на шпански скали на тој потег.
- Ќе донесеме забрана за градба на овој потег, кој ја опфаќа и улицата на Кејот, но одлуката ќе ја опфати и изградбата на Шпанските скали, а не само на оваа небулозна улица. Нема да дозволиме и изградба на Шпански скали. Ја повикуваме власта да се откаже од изградбата на вакви градби, во спротивно ќе изгласаме забрана на истите, рече Жерновски, на заедничка прес-конференција со претседателот на СДСМ Зоран Заев.
Жерновски истакна дека одлуката на опозицијата не е политичка и наведе дека две недели до назначувањето на нови министри има офанзива на нови градби од проектот „Скопје 2014“.
Според претседателот на СДСМ Зоран Заев, центарот на Скопје станува се попроблематично место на живеење.
- За проектот „Скопје 2014“ нема анкета и граѓаните не се прашани за инвестицијата од 600 милиони евра. Сообраќајниот метеж, со ова, бидејќи нема инфраструктурна поставеност, дополнително се комплицира, рече Заев.