Почина новинарката Неда Бакевска

Скопје, 20 декември 2015 (МИА) - На 41 година денеска во Скопје почина Неда Бакевска, новинарка на Телевизија „Телма“ во редакцијата за култура. 

Бакевска е родена во 1974 година, дипломира на Филолошкиот факултет, на групата за македонска и јужнословенски книжевности, со англиски и француски јазик и литература и магистрира на Институтот за политичко-правни студии во 2001. Беше редактор и преведувач на книжевни дела од англиски јазик. 

- Според сопствените интересирања и афинитети, но и како ќерка на истакнатиот писател Петре Бакевски, Неда Бакевска сиот живот го посвети на книгата во секој нејзин вид, не само како страствен читател на поетски, прозни, публицистички и теориски дела, но пред се како професионален проследувач на овој домен во нејзиниот зрел, седумнаесет години долг работен век, почнувајќи од нејзиниот повеќестран ангажман во книгоиздателството „Култура“ каде што се вработи во 1998 година, се до нејзината уште покреативна професионална фаза остварена како новинар во Телевизија „Телма“ каде работеше од 2000 година до денес, објави ТВ Телма. 

Прераната смрт ја прекина нејзината подготовка на докторската теза „Влијанието на новите комуникациски технологии врз формирањето на виртуелни заедници: реконструирање на идентитетите во процесот на блогирање“ на Институтот за македонска литература.

Посмртните останки на Неда Бакевска ќе бидат изложени утре, 21 декември,  во 12.30 во капелата на гробиштата Бутел во Скопје. Погребот ќе биде извршен во 13.30 часот.