Скопје, 10 јуни 2016 (МИА) - Лидерот на ВМРО-ДПМНЕ и поранешен премиер Никола Груевски денеска се одзва на поканата и пристигна на распит кај судија во претходна постапка во Кривичниот суд во Скопје, како осомничен во случајот „ТНТ“ на Специјалното јавно обвинителство (СЈО).
СЈО вчера достави предлог на лидерот на ВМРО-ДПМНЕ да му биде определена мерка за обезбедување на присуство. Груевски во Судот дојде со неговиот адвокат Никола Додовски.
Во судот попладнево дојде и градоначалникот на Гази Баба Тони Трајковски, кој исто така е осомничен во случајот „ТНТ“.
Кривичниот суд денеска соопшти дека СЈО вчера доставило пет предлози за определување мерки за обезбедување присуство. Сите предлози се распоредени кај судии на претходна постапка кои во текот на денешниот ден ќе постапуваат по нив, а лицата се повикани во судот.