Во Охрид утре промоција на едицијата „Црните страници на УДБА“ на Архивот на РМ

Охрид, 16 ноември 2016 (МИА) – Во Центарот за култура „Григор Прличев“ во Охрид утре ќе биде промовирана едицијата „Црните страници на УДБА“, издание на Државниот архив на Македонија.

Директорот на Подрачното одделение на Архивот на Република Македонија во Охрид Славица Јанковска најавувајќи ја промоцијата истакна дека се работи за опсежно дело, собрани документи од страна на Архивот на РМ, со огромно значење не само за македонската историографија и документаристика, туку и за целокупното општествено живеење.

- Низ Црните страници на УДБА се отсликани голем број судбини, животи на наши предци и луѓе кои ги познаваме. Оваа едиција допрва треба да се претстави како историја која треба да се проучува, истакна Јанковска.

Таа појасни дека во едицијата има и делови што се однесуваат на лица прогонувани од државните служби на комунистичкиот режим од Охрид и околните општини, со забелешка дека постојат уште документи што не се објавени и ќе се откриваат.

- Се надевам дека и во Охрид има луѓе што поседуваат такви документи, ги повикуваме да ги достават до Архивот за да биде дополнета документацијата, рече таа.

Едицијата е составена од 16 книги во девет тома и ќе може да се купи како комплет по цена од 15 илјади денари.