Скопје, 7 мај 2017 (МИА) - Се реализира граѓанската волја и во следниот период е особено важно да се овозможи мирен трансфер на власта и формирање нова реформска влада. Тоа е врвен интерес на граѓаните и државата, реагира СДСМ на обвинувањето на ВМРО-ДПМНЕ која соопшти дека партијата на Зоран Заев премолчува „провокации со кои почнува реализацијата на тиранската платформа“.
- Ниту ќе има штети по употребата на македонскиот јазик, ниту пак е загрозена унитарноста на државата. Тоа е измислица на Груевски и раководството на ВМРО-ДПМНЕ, единствените неколкумина во државата кои имаат интерес да ги блокираат промените, во обид да ја избегнат одговорнсота за злоделата врз граѓаните.
Цела Македонија ја чека новата влада. Граѓаните ја знаат, ја читаат Програмата на новата реформска влада на унитарна Македонија, којашто носи живот за сите, правда, евроатлантски перспективи. Парламентарното мнозинство ја презеде и ќе ја реализира обврската дадена пред граѓаните, да ја формира новата Влада и да ги реализира потребните реформи за овие цели, наведува СДСМ.
Во соопштението партијата додава дека има писмо до претседателот Ѓорге Иванов за формирано ново парламентарно мнозинство и дека Иванов, како што посочува, е должен да постапи согласно уставните обврски кон граѓаните.