Скопје, 9 јуни 2017 (МИА) - ВМРО-ДПМНЕ во денешното соопштение оценува дека најавите за дебати, уривањето на огради и укинувањето на програми нема да го подобрат стандардот на граѓаните.
Од партијата бараат СДСМ да почне да работи на реализација на ветувањата што им ги дале на граѓаните.
- Тоа што Заев ќе ја урива оградата од Владата или ќе ја укине програмата Кембриџ нема да помогне на економски план каде вети 16.000 денари минимална и 30.000 денари просечна плата. Тоа што Заев сака да се спаси од одговорност за криминалот со покренување на постапка за смена на јавниот обвинител нема да им помогне на докторите да добијат плата од 100.000 денари како што им беше ветено, се вели во соопштението.
ВМРО-ДПМНЕ посочува дека граѓаните очекуваат реализација на проектите што ги ветиле како поврат на 15 процент на ДДВ со кој граѓаните ќе добиеле 30.000 денари годишно приход.
- Повторувањето на грчките црвени линии не им значи ништо на граѓаните кои очекуваат СДС да обезбеди брз влез во ЕУ и НАТО, како што тоа ветија, без притоа да се задира во идентитетски прашања или да се прават договори на штета на македонскиот народ.
Граѓаните очекуваат нови 500 километри автопат, без притоа СДС да измислува изговори за наводни застои за автопатите почнати од ВМРО-ДПМНЕ, кои се во крајна фаза на градба, се наведува во соопштението.