Спасовски: Поранешни министри за земјоделство приведени за злоупотреба на службена положба

МВР во соработка со обвинителството денеска спроведе акција за приведување на четворица поранешни министри и заменици за земјоделство во врска со истрагата за злоупотреба на службена положба и овластување за доделување земјоделска помош и давање под закуп државно земјоделско земјиште. Со ова тие предизвикале штета на Буџетот од 1,4 милиони евра.

Ова денеска го изјави министерот за внатрешни работи Оливер Спасовски по свеченото затворање на Обуката „Идентификување на потеклото на пожар – несреќен случај или кривично дело“ што се одржа во Центарот за обука во Идризово во организација на Дирекцијата за заштита и спасување.

Спасовски истакна дека се обезбедени сите четири лица кои се опфатени со истрагата и додаде дека сите информации во врска со случајот ќе бидат обезбедени кога ќе заврши овој процес во заедничко соопштение со Јавното обвинителство.

Истрагата, како што претходно беше објавено, се води против поранешните министри за земјоделство Ацо Спасеновски, Михаил Цветков и Љупчо Димовски, како и против заменик-министерот Кристијан Делев.