Македонски Телеком ќе донира мобилен интернет за сите 30.000 основци и средношколци кои доаѓаат од семејства во социјален ризик за да ги следат наставните програми на платформите за далечниско учење, определени од Министерството за образование и наука, најави денеска директорот на Македонски Телеком Никола Љушев.
Тој на денешната прес-конференција во Владата посочи дека далечинското учење е задолжително, но како што потенцира, сите деца ја немаат таа можност.
-Иако сме земја со фиксен интернет со пристап од околу 80-тина проценти од територијата околу 30.000 деца кои доаѓаат од семејства со социјален ризик или 18.400 домаќинства не се во можност да ја следат наставата. Во соработка со МОН и МИОА одлучивме дека можеме да најдеме заедничко решение на овој проблем. Телеком ќе донира мобилен интернет за овие ученици што е еден чекор напред кон решавање на предизвикот за обезбедување еднакви услови за дигитална настава за сите деца, објасни тој.
-Вклучувањето на ранливите категории во дигиталното општество за нас не е ново, но е приоритет во услови во кои единствениот пат по кој се движиме е онлајн, потенцира Љушев.