Претседателот Стево Пендаровски денеска во Тетово изјави дека според информациите кои ги добил од надлежните, досега не постојат индиции дека пожарот во модуларната ковид болница бил намерно предизвикан. Надлежниот јавен обвинител го информирал дека за околу час до два и формално ќе го завршат увидот кој трае веќе втор ден и во најбрз можен рок потоа ќе излезат со нивниот извештај. Тоа, рече, треба да се направи што побрзо и постручно за да нема никаков сомнеж во јавноста. Исто така, потенцира, одговорност мора да има.
-До овој момент нема никаков индикатор дека ова е направено намерно со цел да се постигне некаква друга политичка цел. Меѓутоа, велам, тоа е во овој момент и се разбира тоа ќе ви го каже денеска или наредниве денови надлежниот јавен обвинител. роцедурата е тие даваат наредби до другите надлежни институции од обдукција до МВР. Обвинителот ми рече дека ќе им даде многу кратки рокови, веројатно пет дена за секоја институција да одговори од својата надлежност, по нивното добивање на тие сепак извештаи ќе излезе тој со свој збирен извештај во кој ќе се види прво што е причината за пожарот и второ и дали зад тоа евентуално има човечка грешка, истака претседателот Пендаровски во денешната изјава пред опожарената болница во Тетово.
Тој истакна дека за да нема сомневања во истрагата за овој немил настан, Владата изразила подготвеност да повика и странска експертиза. Основа за подетална анализа, според претседателот, е и самиот факт што модуларната болница изгорела во целост за само неколку минути.
– Меѓутоа, тоа е работа на надлежните институции. Имаме доволно стрчни кадри во сите овие институции кои се инволвирани во оваа т.н. повеќеслојна истрага. Јас мислам дека за кратко време ќе ја знаеме вистината. Јавно да кажам, до овој момент, бидејќи имаше и такви шпекулации, јас ова утро разговарав на пример со претседателот на Словенија, Пахор, тој ме праша исто, има различни шпекулации дека е можеби подметнато, дека можеби има врска со 30 години независност, дека има некакви конспирации за тоа. До овој момент нема никаков индикатор дека ова е направено намерно со цел да се постигне некаква друга политичка цел, рече Пендаровски, додавајќи дека детали за тоа денеска или во текот на наредните денови ќе даде надлежниот јавен обвинител.
Според него, по завршување на истрагата и изготвување на извештајот, мора да има одговорност за овој немил настан. Не смееме, вели, да дозволиме истрагата да трае со месеци и на крај да не знаеме каде завршила. Македонската јавност, според Пендаровски, заслужува брз и темелен одговор без какви било паузи во истрагата.
-Јас секогаш инсистирам да има одговорност и морална, и политичка, и субјективна и објективна, каква и да има, да се научиме на тие работи. Меѓутоа, не можам да тврдам во овој момент бидејќи навистина не знам дали постои основ за таква одговорност. Она што го знам е дека во што покус временски период мора сите надлежни органи и ние како држава во целина да реагираме брзо, да направиме темелна истрага и да излеземе со извештај во кој никој нема да има сомнеж. Во таа смисла ја поздравив понудата која Владата денеска ја прифати од странски меѓународни експерти да дојдат тука и да видат што се ние работиме за да нема сомнеж дека некој нешто прикрива или не сека нешто да истражи потемелно или до крај. Јас знам дека постои понуди од неколку држави членки на НАТО Алијансата, од најмоќните во Европа да помогнат со стручна експертиза во тој дел и мислам дека тоа, нивното доаѓање ќе се случи најверојатно следните 48 часа, рече претседателот Пендаровски.
Тој во одговор на новинарско прашање дали меѓу настраданите имало и посетители, а не само болни или здравствени работници, рече дека нема такви информации.
–Не го знам тој детаљ. Она што го прашував колку легла биле пополнети од тие што биле на располагање, мислам дека од сите легла на располагање осум воопшто не биле пополнети, сите други 26 се чинам пополнети и пред моментот на избивање на пожарот има уште 4-5 медицински лица, сестри и доктори. Многу е тешко да се каже дали се тие меѓу овие 14 тела кои се на судска медицина затоа што ова што го добив последново од судска медицина е дека денеска веројатно, можеби утре најдоцна ќе биде завршена обдукцијата на сите 14 тела. Меѓутоа, потоа почнува постапката за утврдување на причините и идентификацијата на луѓето, значи кои се луѓето. Во овој момент ние не знаеме кои се овие 14 лица, рече претседателот.
Тој додаде дека има информација оти биле повикани роднини на лицата кои се лекувале во болницата да дадат крв и да дадат друг материјал за идентификација кој ќе им помогне побрзо да ја завршат таа работа бидејќи идентификацијата на лицата ќе оди тешко.
-Она што знам, за граѓаните ме прашувате, е дека граѓани помагале 7-8 луѓе да извлечат преку прозорот од внатре од просторијата во која избил пожарот. Не сум чул дека биле внатре, тоа ќе го прашате директорот на болницата, рече Пендаровски во изјавата за медиумите во Тетово.
Во пожарот во Ковид болницата во Тетово, загинаа вкупно 14 лица. Во ковид – центарот за време на пожарот, како што посочија од МЗ, имало вкупно 26 пациенти, останатите 12 се на лекување во тетовската болница и се надвор од животна опасност.
-Нема настрадани здравствени лица, неколкумина се со полесни повреди, информираа од Министерството и изразија сочувство до семејствата на загинатите и длабоко жалење за страотната несреќа.
Од Министерството потенцираат дека во текот на денот постојано ќе информираат за сите нови детали околу случајот и апелираат медиумите и граѓаните да ги следат официјалните информации и да се воздржат од шпекулации за овој немил настан.