Стратешките приоритети на Министерството за здравство, особено во областа на модернизацијата и дигитализацијата, биле во фокусот на средбата на министерот за здравство Азир Алиу со висока делегација на Светска банка, предводена од Река Менон, менаџер за здравство, исхрана и популација за регионот на Европа и Централна Азија, како и со д-р Свен Нелсен, кораководител на здравствен сектор на Светска банка за земјава, Али Хаманди, виш економист и Мрика Алиу, виш специјалист за човечки развој.
Алиу, како што соопшти Министерството за здравство, ги презентирал стратешките приоритети на Министерството за здравство, и истакнал дека меѓународната експертиза и поддршка претставуваат клучен сегмент во процесот на модернизација, особено во областа на дигитализација, како еден од главните приоритети на Министерството, како и за телемедицина, примарна здравствена заштита, и инфраструктурни и технолошки надградби на системот.
На состанокот била презентирана тековната аналитичка работа на Светска банка во здравствениот сектор, со акцент на системот за долгорочна нега и модели на здравствено финансирање.
Од Министерството додаваат дека претставниците на Светска банка изразиле подготвеност за натамошна поддршка на реформите во здравството, а биле разгледани и можните области за зајакнување на соработката и за унапредување на здравствениот систем.