Во Битола распишан конкурсот за наградата 4-ти ноември

Битола, 30 август (МИА) - Управниот одбор за доделување на највисоките општински признанија, наградата 4-ти Ноември, го распиша традиционалниот конкурс за едногодишни остварувања, како и наградата За животно дело.

   За едногодишни достигнувања се наградуваат физички и правни лица кои постигнале видни резултати во областа на стопанството, науката, уметноста, културата и други сегменти од животот значајни за развојот на градот.

   Наградата За животно дело во Битола е востановена од пред неколку години и ќе се додели по петти пат. Досегашни добитници на ова престижно признание се: ликовниот уметник Тоде Ивановски, раководителот на Мал битолски Монмартр Коста Хаџи-Антоновски, актерот Јоана Поповска и писателот Владимир Костов.

   Советот на Општина Битола неодамна го востанови и признанието Почесен граѓанин на Битола,но тоа се уште никому не е доделено.

   Конкурсот за највисоките општински признанија ќе биде отворен до 30 септември, а наградите ќе се доделат на Денот на ослободувањето на Битола, 4-ти ноември.