Објавена книгата „Конституционализмот и човековите права“ од Рената Тренеска-Дескоска

Скопје, 10 декември (МИА) - „Конституционализмот и човековите права“ е најновото издание на Рената Тренеска-Дескоска, професор на Правниот факултет во Скопје. Книгата содржи три дела и ја истражува врската меѓу поимите - конституционализам, устав и човекови права, од теоретски аспект, но и на ниво на нивна практична реализација во Република Македонија.

- Факт е дека човековите права повеќе припаѓаат на сферата на „шпекулациите“ и „илузиите“ отколку на сферата на реалноста и практиката. Тоа ја прави идејата за човековите права актуелна и атрактивна за истражување. Но, фактот дека додека постои државната власт ќе постои и можност (и не само можност) за кршење на човековите права, го прави овој проблем перманентен, вели авторката во предговорот на својата книга.

Таа ги дефинира човековите права како инструменти за заштита на индивидуите од државата и од другите индивидуи, т.е. како инструменти за ограничување на државната власт. Идејата за ограничување на државната власт е централна категорија на конституционализмот.

- И покрај импресивните одредби за човековите права, евидентни се нивни злоупотреби во многу земји. Тоа повторно го покренува прашањето за воспоставување на конституционализмот. Усвојувањето на соодветен устав е значајно, но уставот треба да биде "исполнет со живот", смета Тренеска-Дескоска.