Мобилком Австрија - нов мобилен оператор во Република МакедонијаСкопје, 5 февруари (МИА) - По објавувањето на македонската Влада дека Мобилком Австрија е новиот мобилен оператор во Република Македонија, Групацијата Мобилком Австрија во денешното соопштение вели дека пренесувањето на знаење и искуство од нивна страна ќе придонесе за натамошна либерализација на пазарот.
Во соопштението се додава дека цената за лиценцата за GSM 900/1800 изнесува 10 милиони евра и е доделена за период од 10 години, со тоа што може автоматски да се продолжи за уште 10 години.
Мобилком Австрија започнува преговори со надлежните институции за изработка на договор за лиценцата.
- Добивањето лиценца во Република Македонија, по Србија, за нас е нова можност за развој на бизнисот со мобилна телефонија на уште еден атрактивен пазар. Тоа е во согласност со стратегијата на ширење на групацијата Мобилком Австрија во Источна и Југоисточна Европа. Заради размената на искуства и знаење со операторите на Мобилком Австрија Групата во соседните земји, оваа директна инвестиција ќе придонесе во понатамошниот развој и либерализација на овој пазар, истакнува Борис Немшиќ, претседател на Управата на Телеком Австрија и Мобилком Австрија.
Новиот оператор во сопственост на Мобилком Австрија треба да почне со работа во рок од шест месеци по потпишувањето на договорот за лиценца и треба да обезбеди 30 процентна покриеност на населението за 12 месеци работа. Во рок од 24 месеци работа треба да достигне 50 проценти покриеност на населението, а во рок од 48 месеци, 90 проценти, се вели во соопштението од Групацијата Мобилком Австрија.
|