Јанешлиева и Мусовиќ изложуваат во Варна Скопје, 23 јуни (МИА) - Македонските уметници Славица Јанешлиева и Оливер Мусовиќ учествуваат на Фестивалот на современа уметност „Продукт 2007“, што до 2 јули се одржува во бугарскиот град Варна.
На ова четврто издание на фестивалот, во организација на здружението “Кера” од Варна, учествуваат триесетина уметници од целиот свет, кои ќе се престават на повеќе изложби, перформанси и видео проекции.
Темата на фестивалот, како што информираат Јанешлиева и Мусовиќ, е “Преку границите” и има за цел естетски, политички и социолошки да ги преиспита зацртаните граници во најразличен смисол, поигрувајќи се и релативизирајќи ги зададените односи организатор-учесник, уметник-публика, при што тие си ги заменуваат улогите.
Славица Јанешлиева ќе се претстави со дигиталниот отпечаток "Комплет за хартиена кукла девојче - пионер" (2006), а Оливер Мусовиќ со серијата фотографии под наслов "Возење" (2006), кои за мотив ги имаат вообичаените превозни средства со тркала.
|